Niiwi Gliserallee –zentral glägu


D´Überbüwig Niiwi Gliserallee isch zentral imä riewigu, beschtens erschlossnu Wohnquartier glägu. D´Bushaltischtell Gliserallee isch 150 Meter ewäg, und va da üs chänd Ihr där Bahnhof Brig und die verchehrsfriji Innuschtadt in drii Fahrminütä erreichu. ´Z beliebta Ichöifszäntrum «Simplon Center» ischt 800 Meter wiit ewäg. Zum Schüelzäntrum Brig Süd (Chindergartu bis Oberstufu) sind´s 600 Meter resp. 8 Minütä Füessmarsch. ´Z einziga diitschsprachiga Gymnasium im Kanton Wallis, ´z Kollegium «Spiritus Sanctus», chammu va där Niiwa Gliserallee i 15 Minütä z´Füäss oder i 5 Minütä mit um Velo erreichu.

Fär d´Fahrt zum Chemiekonzern Lonza im 10 Kilometer entfärntu Visp miesster 12 Minütä Autofahrt irächnu. ´Z Spitalzäntrum Oberwallis, wo in du neechschtu Jahr starch üsgibüwut wird, isch 900 Meter oder 5 Velominütä Füesswäg va där Niiwa Gliserallee ewäg.

Brig-Glis als Läbunsmittelpunkt

Brig-Glis isch die läbundschti Stadt vam Oberwallis. Die Stadtgmeind bietet ihru Biwohnär näbund historischu Ziitziigä wie dum Stockalperschloss und där autofriiu Altstadt viel Wohn- und Läbunsqualität – riewigi, gipflägti Wohnquartier inneru intaktu Bärglandschaft, vielfältigi Sport- und Friiziitmäglichkeitä in nechschter Umgäbig und äs breit gfächeruts Bildigs- und Kulturagibot trägund zur Attraktivität va där Stadt im Härzu va dä Alpä bii. uber 13’000 Iiwohnär sind da gäru duheimu in dr iiladendu Mischig va städtischer Gwandtheit, där alpinu Boduständigkeit und dum liechtfiessigu Ambiente vam Südu. Brig-Glis hät ä hüüfu hibschi Plätz und Gartubeizjini und gilt wahrli als Mittelpunkt vam Oberwallis – als attraktivs Dienschtleischtigszäntrum, züekunftsgrichtuti Bildigsstadt und beschtens aagschlossnigä Verchehrs-Chnotupunkt. D´Neechi zum italienischu und franzeesischu Läbunsrüüm wie öi die hüüfu Gäscht trägund viel zum eimaligu, multikulturellu Touch und um mediterranu Läbusgfühl vam Ort bii.

Friiziit und Erholig

D´Iiwohnär und Bsüechär va Brig-Glis profitierund im Summer wie öi im Winter vomänä Feriu- und Friiziiteldorado in neechschter Neechi. Ob Ski- oder Wandertourä, Langlöif oder Golf, Bäiku, Trekking oder Snowboardu – d´Stadtgmeind bietut sich als Üsgangspunkt in d´neecheri Umgäbig richtig aa. Öi in dä bekanntu Thermalbäder in Leukerbad oder Brigerbad ischmu schnäll.

Schüelä, Ichöifu, Kultur

Siit där Grindig vam Kollegium «Spiritus Sanctus» 1662 hät sich Brig-Glis zumänä Bildigszentrum mit internationaler Vernätzig entwicklut, wa vam Chindergartu bis zur universitäru Üsbildig die unnerschiedlichschtu Bedürfnis abdeckt. Öi die renommierti Internationali Hotelschüel «César Ritz» zieht ä hüüfu Studierundi üs aller Wält aa.

Brig-Glis bietut nid nur gschichtsträchtigi Plätz mit ä hüüfu Café und Reschtaurant, aber ladut i schiner autofriju Zonu mitumä sehr vielfältigu Agibot zum Flanieru und Shoppu i. Numu zwei Kilometer va där pittoresku Altstadt ewäg bietut ´z Simplon Center äs urbans Shoppingerläbnis.

Sälbverständlich bietut ´z Zentrum vam Oberwallis öi äs riichhaltigs Kulturagebot – Theater, Konzärti, Üsställigä, ´z Bibliothekä- und Mediezäntrum Oberwallis u.v.m. Jungers Kulturschaffu und äs abwächsligsriichs Programm finnund Interessierti bi «ZeughausKultur» a der Gliserallee.

Verchehrsaabindig

D´Entwicklig va Brig-Glis hangut äng zämmu mit schinäru veerchehrstechnischu Erschliessig. D´Stadtgmeind Brig isch siit där Eröffnig vam Simplontunnel 1906 zumänu bediitundu Verchehrs-Chnotupunkt cho, wo sich die internationalu Axä va där Strass und där Schienu chrizund. D´Eröffnig van der NEAT Lötschberg 2007 isch än wiiterä Meiluschtei gsi, wa d´Bahnreis in du Nordu um 40 Minütä verchirzt hät.